سته و تلاتين دقه قلب ..من قلب لسه بينبض

ImageChef.com Poetry Blender

احب ان اقولكم اني عيد ميلادي بكره .......

ميررررررسي لكل الناس اللي بيقولوا كل

سنه و انتي طيبه

بس بجد احساس غريب و انا ببدا سنه جديده تكاد تكون حاسمه ؟؟مش عارفه ليه حاسمه يمكن عشان هبتيدي اول سنه هتوصلني لسن جديده مش سهله ..يمكن عشان بجد مرحله جديده في حياتي

المفروض اقف و احاسب نفسي و مش عارفه ايه و اقول عملت ايه و لسه هعمل ايه

يمكن لان مش سهل ان الواحد يوصل للعمر ده و هو مش محقق كل احلامه

يمكن لاني ببص الاقي السنه اللي فاتت كانت سنه مهمه اوي في حياتي ..على الصعيدين الدولي و المحلي علي راي نشرات الاخبار

يمكن لاني لسه ما حققتش اجمل حلم ليه في اني يبقي عندي كائن صغير قمر يقولي ماما

يمكن عشان زهقت من كل ما اقابل حد و يسالني انتي عندك كام سنه و لا حضرتك يا باشمهندسه دفعة كام ..الاقي ضبهه وقع لتحت و عنيه بحلقت فيه و يقولي مش باين عليكي خااالص ..طيب اعمل ايه اعمل عمليه تجميل تكبرني شويه ..و الله هم يبكي و هم يضحك

يمكن لاني زهقت جدا مووت خالص من ان كل ما اروح فرح حد من العيال اولادي اللي كانوا اول امبارح بيلعبوا في حجري الاقي نظرات من الحرج في عيون خالاتي و خيلاني و امي اللي الله يكون في عونها

و لا اقولكم ايه ..ده انا دخلت عند غاده برايد لاقيتها يا حول الله عامله ايه عشان وصلت ال 30 مش تراعي شعورنا كده برضه يا برايد مكنش العشم يا اختي و الله ده الواحد بطل علي كده و مش واخد باله

و لا ايه الناس بقي اللطاف اللي بيخبوا عليه انه بنتهم هتتجوز اصلي طلعت عيني وحشه اذ فجاه و الله و الا بعض من كنت اعتقد انه اصدقاء لما اتصل فيفضلوا يقولوا عندنا مشاكل وووو في ايه يا جماعه حد قال لكم اني ماشيه اشد في شعري و اتجننت و لبست جلبايه مقطعه و سبت الهندسه و قاعده ببيع فل وورد في الاشارات ما تحترموا نفسيتكم المعقده

و الله و الله ما حد صعبان عليه الا امي حببتي الست يا عني هتفر من عنيها الدمعه و هي يا حببت يبتقولي عايزة هديه ايه السنه دي قلت لها ميرسي يا ماما و الله ما عايزة حاجه ..نفسي بس اسعدها

بس سيبكم من الهم الازلي بتاع قصه الجواز اللي تزهق دي خصوصا بعد الحمد لله ما بقي كل اللي يعرفني ما يتقدمليش بحجه جديده نوووفي و هي ان مستوايا عالي ..الحمد لله ..يا ريت الواحد كان اخد دبلون تجاره و عاش عيشه فل و اتجوز عبد السميع الميكانيكي

بس بعيد عن كلام الناس اللي لا بيقدم و لا ياخر علي راي الاغنيه ...لحمد لله علي نعمه ربنا

و الاهم عندي ..اني و بجد حاسه ان لسه عندي قلب بيعرف يحب الناس و الاطفال و القرايب ..و الحمد لله بفرح لهم و بيهم

و الاهم ان قلبي الصغنون ده - في رايي - انا حره في قلبي ..لسه بيدق ..لسه بينبض

و كل سنه و انا طيبه