قولي ايه معني السعاده

علي رأي اسماعيل ياسين ..قولي ايه معني السعاده قولي يا صاحب السعاده قولي قولي

و للي ميعرفش دي اغنيه من فيلم لاسماعيل و حلوه معناه ايه هي السعاده

و بما اني الفتره اللي فاتت مجبره درست فلسلفه لاقيت ان كل الفلاسفه قالوا ان غايه الانسان هي السعاده

و انها رأس المثلث الذي يبحث عنه كل انسان ..و انها القيمه المطلقه التي نبحث عنها و الكام ده ايه ..الكلام ده كبير اوي

و بعيد عن الفلسفه اللي خرمت مخي سيادتي ..قلت طيب هي السعاده عندي ايه ؟؟

اممممم ..بصراحه ما لاقيتش اي سعاده و الحمد لله

من مشاكل شغل علي مشاكل بيتنا علي مشاكلي انا ..اللي تنحصر في كوني انا شخصيا علي شويه نشرات الاخبار اللي تخلي السعاده ي خبر كان .زمن حروب علي ارتفاع اسعار علي ناس بقيت بتاكل في بعض من غير اسباب

بس فجأه لاقيت سعادتي .......................................الحمد لله

عارفين في ايه ..ربنا كرمني من فتره و بدرس لطلبه حلوين اووي بحبهم جدا
لاقيت السعاده معاهم و بينهم هم في الجامعه يعني عمرهم صعب التعامل معاه

لكن بحبهم اووي و لاقيت ان سعادتي ربنا بعتها لي معاهم ووسطهم

لما بيكلموني يطلبوا اي حاجه بطير من الفرح و لما بدرس لهم و الاقي نفسي بوصلهم علم بفرح جدا

و لما بشد عليهم و يسمعوا الكلام بحس اني بعمل حاجه

صدقوني لاقيت سعادتي في الشباب دول و هم ماشاء الله حلوين و منهم اشقياء بس بمووت فيهم

واحد منهم مش بيفهم الا و هوواقف يفضل طول السكشن واقف ..بس اعملوه ايه بموت من الضحك جوايا طبعا

و في منهم اذكياء اووي و في منهم بنات امامير و لهم قصص حب بفهمها من عيونهم و بيتكسفوا مني لما بيحسوا اني عرفت

الحمد لله علي نعمه ..بجد لاقيت سعادتي في توصلي لجزء ولو صغير من العلم و في تربيه الشباب دول

ربنا يساعدني و اقدر انجح معاهم اكتر لحسن طلعت مسئوليه مش سهله

يا ريت كل حد يبص حواليه اكيدهيلاقي ربنا مديله سعادته في شيء