خيالات

بابها يدق وتدخل طالبة تستأذن وهي تقول
صباح الخير يا دكتوره ..أتفضلي حببتي
ممكن معايا بس بابا ..اه طبعا أتفضلي أتفضلي
لا ترفع عينيها لانشغالها بمجموعة كبيرة من الأوراق متراصة أمامها
تدخل الفتاة الجميلة ومعها رجل في نهاية الأربعينات من عمره
صباح الخير يا فندم ..تنتبه له
ويكمل أنا والد سارة ..تقوم من مكانها لترحب به
فتتلاقي الأعين ..أهلا ايه ده مين أنت
ازيك وأخبارك ايه ..أتفضل
ينظر اليها..ما زالت كما هي الا من ظهور بعض علامات السنين علي وجهها
اهلا حببتي ؟أزيك سارة كبرتي ممكن أخدك ف حضني
تأخذها في حضنها وتمنع دمعة حائرة من النزول
وعينيها بنفس اللحظه لا تترك عيناه ..أجدك كما أنت حبيبي
تجلس مكانها محاولة وضع قناع الجديه من جديد..ولا تنجح
تنظر اليه كثيرا..وعينها تقول ما نسيتك لحظه
وتقول الشفاه..كبرت سارة بس لسه شبهك أوي
يقاطعها هي بالسنة الأولي و قلت أعدي أعرفك عليها
أنتي عاملة ايه وأزي أخبارك
أنت اللي أخبارك ايه
اهوه بسافر وأرجع وسارة ومامتها وأخوتها استقروا بمصر
تنظر للفتاة ..زي ما أنتي وبقيتي أحلي يا سارة
تتعلق الفتاه بعيونها كأنها تريد أن تجد أي اجابات
ويصمت الجميع لحظات ثقال
يهم هو بالانصراف..مش عايزين نعطلك بس خدي بالك منها
انا قلقان عليها عشان مش موجود
هي بصوت مرتفع قليلا
سارة كل يوم تعدي عليه عايزة حاجه مش عايزة حاجه
تيجي تسلمي علي وتقوليلي صباح الخير
تنظر اليه وتمتلأ عيونها بنفس البريق الذي كان يبهره فيما مضي
تخرج الفتاه ويؤخر هو نفسه قليلا
أنتي كويسه ..زي ما أنتي متغيرتيش
ضاحكه هي ضحكتها المعهودة له..بس انت عجزت أوي
مش هوصيكي خدي بالك منها
هي بصوت يميل لبكاء السنين ..بنتي وربنا رجعها لي
ويذهب تاركا أيها تعود لدفن باقي الذكريات وسط الأوراق التي لن تنتهي