مريت من قدام سور المستشفي بعد تقريبا 30 سنه يا خبر
هو هو لون السور البايخ الرمادي الباهت
هو هو المدخل يا خبر بصيت علي الدور اللي كانت فيه قوضتك
وحشتني اوي كلمه بقولها كتير بس المره دي طلعت بوجع
افتكرت حاجات غريبه جدا وانا اللي مبقتش افتكر القريب
افتكرت لما كنا بنزورك و نهرب لك الاكل اللي بتحبه
افتكرت فسحه يوم الجمعه مع بابا وماما لك في المستشفي اللي علي النيل
(غريبه طيب ما كان بابا بيخرج معانا وكان كويس و طيب ايه اللي حصل)
افتكرت الطعميه و تهربيها من سور المستشفي عشان ممنوعه عليك
افتكرت حاجات غريبه اوي
افتكرت لون الشنطه اللي ماما كانت بتملاها حاجات لك
كانت شنطه بلاستيك من بتوع زمان اللي لها ودان تتشال منها
افتكرت انه رغم المك الرهيب لكن كنت بتضحك و مالي الدنيا فرحه حواليك
افتكرت ان كانت صحبتك وقتها عبد المنعم ابراهيم ههههه
وتحيه كاريوكا مش ممكن كنت راجل خطير اي حد يقربلك يحبك
افتكرت قعدتي معاك في تراس القوضه
ووعدك ليه بركوب اللنش في النيل اللي كان بالنسبه لي وقتها حلم من الف ليله وليله
افتكرت وانا بقولك (خايفه اركبه بخاف من البحر يا جدو)قلتي لي هبقي جنبك
افتكرت حضنك و بوستك وحنانك اللي محتاجه له اوي
افتكرت أن اخر يوم جمعه قبل ما تسبنا مروحناش نزورك عشان اخويا كان عيان
افتكرت لما عرفت انك سبتنا ومقدرتش اعيط سنين
افتكرت الكرسي بتاعك في الصاله اللي ممنوع حد يقعد عليه غيرك
بس كنت بتقعدني عليه معاك
افتكرت خروجتنا من ورا ماما و الايس كريم اللي بتاكلهولي من غير ما حد يعرف
افتكرت العصفورة اللي كنت بجري وراها معاك ومسكتها عشان اعرف اكلمها
افتكرت العجله اللي ركبتني وراك عليها ونمشي نتفسح بيها
افتكرت الجامع اللي كنت بروح اصلي فيه معاك الجمعه و صاحبك النوبي الاسمر
بحبك اوي و محتجالك اوي الايام دي فينك يا جدو وفين حضنك
2 comments:
فعلا الزكرى ناقوص رنان يدق ف عالم النسيان
تعيشي وتفتكرى يا نور ومعلش هكذا حال الدنيا ناس بنحبهم يسبونا عشان ناس تانيه هنحبهم برضو يجو ودى حكمة ربنا ف خلقه متزعليش بقى ربنا يرحمه ويخله فسيح جناته
يا رب واشكر لكي كلماتك الرقيقه
Post a Comment