كله بيخلص ..الحمد لله

الحمد لله

خلصت امتحاناتي في السنه بتاعت الدكتوراه دي
ياااااه و الله ايام فكرتني بامتحانات الثانويه العامه في تقلها

بس طبعا وقتها كنت مهتمه بالمجموع فكنت خايفه عشان كده

لكن السنه دي مهتمه اني انجح و بس عشان كده خايفه برضه

الواحد معدش قادر يذاكر و لا يركز

اروح قال ايه امتحن زي العيال الصغيرين في شويه ورق لازم افتكرهم

شوفتوا بلدنا قمر و حلوه ازاي

لسه بيقيمونا بالامتحانات التحريري و احنا في الوقت ده و العمر ده

بدل ما نعمل ابحاث مثلا تفيدنا في المرحله الجايه لا و الف لا لازم نضيع و قت و جهد و فلوس

لكن هنعمل ايه بلدنا بقي و لازن نتحمل كل الانظمه التعليميه الفاشله علي جميع المراحل

بس يا رب انجح بقي لحسن هتبقي فضيحه اني دكتورة و اسقط مثلا و لا يبقي عندي ملحق

ههههه و الله هم يبكي و هم يضحك

ده حياتي وقفت شهور و شغلي اهملته و امي معرفش عنها و لا عن صحتها الا القليل بسبب السنه دي

و اهي عدت زي ما كل حاجه بتعدي ..مش بيقولوا العمر حتي بيعدي

الحمد لله رب العالمين