About Me

My photo
cairo, Egypt
فتاه مصرية- بداخل كل منا نور يستطيع ان يحي معه و يجعله يقويه علي متاعب الحياه احب نوري الذي بداخلي فهل بداخلكم مثل هذا النووووورررر

Dec 6, 2008

نبتدي منين الحكايه

حكايه بقيت بسمعها كتير

و باشكال كتير

بس المضمون تقريبا واحد

من فتره لاقيت وحده صاحبتي بتتصل بيه في التليفون بتقولي فاضيه نرغي قلت لها فاضيه

هي مش صديقه بس اتعرفنا في كورس كده و بعدها جت الظروف و اشتغلنا مع بعض

مش اصحاب يعني استغربت المكالمه ..بس يظهر انها كانت مش لاقيه حد تفضفض له

قالت لي عايزة اخد رايك في حاجه

واحد متقدملي ..قلت خير ..قالت لي متجوز ..قلت يا خبر هو القصه دي مش هتخلص اصلي سمعتلي حوالي عشر خمستاشر قصه من دول

قلت له ليه ..اقصد ..ايه ..فين ..مين ..و بعدين
قالت لي و بدات في العياط المرير ..يا بنتي ما تحكي بتعيطي ليه

و عياااااااااااااااااااااااااااااط لدرجه الانهيار ..انا مش موافقه ..طيب خلاص يبقي بتعيطي ليه ؟؟؟

قالت لي مش عارفه ..قلت لها لأ عارفه

قالت لي مش هوافق مش هقبل اني اتجوز حد مجوز و لا اخد واحد من مراته و لا ولاو لا و خدوا عندكم ساعه من ده

طيب اومال فين القصه ..القصه اني كنت فاكره انه حد كده اي كلام و حد حد عايز يلعب وواخدها سكه ..لكن المفاجاه اني طلعت اعرفه قالتي لي فضلت المح لك و انتي مش فاهمه ليه ...اتخضيت مين .؟؟؟

قالت لي ايوه الدكتور فلان ..دكتور معداش 35 سنه كان معانا في كورس كده ممتاز و شغله فوق الممتاز كان صدفه بيحكي لنا علي مراته بكل ود و حب و احترام

طيب في ايه يا بنتي ..معقوله مش ممكن مش مصدقاه ..طيب ليه ؟؟

قالت لي بعد ما اتعرفنا بمده لاقيته بيقولي بحبك

قلت لها و بعدين ..سافر 3 شهور و مديني فرصه افكر عشان لما يرجع يفاتح مراته

كمان ..هو هيقولها ..ايوة هو مش هيتجوز من وراها هو ما يعملش كده

و هيقوله ايه ؟؟هيوقلها محتاج اتجوز تاني ؟؟

و بعد انهيار و بكا و صوااااااات ..بس انا مش موافقه ..و هقوله ابعد نهائي عني

لاقيت نفسي بدوخ و الله ..يا خبر ..البنت هتموت

هي كمان عندها مشاعر و نص شبابها راح و الباقي في طريقه يروح ..حتي فرصه انها يكون عندها اطفال بدات تتلاشي ؟؟

طيب و بعدين .؟؟؟ هم الرجاله عايزين ايه ؟؟ليه بيعمل كده ؟؟اولا في مراته ..ثانيا في بنات الناس ؟؟

طيب ناس هتقول مش حرام ؟؟؟و ناس هتقول كده افتراه علي مراته طبعا؟؟

و بنات تقول استحاله ؟؟و بنات تقول مش احسن من الوحده ؟؟

و ناس تقول ده حل ي وقت صعب زي ده؟؟و ناس تقول دي مجرمه و خرابه بيوت هتاخد واحد من مراته ...

و ناس تقول و ناس تقول

بس اللي عملته صاحبتي ؟؟انها بعدت فعلا ..بس شوفتها بعدها بكام شهر صدف في الجامع كنت داخله اصلي ..قلت لها ازيك وحشتيني عامله ايه ؟؟ردت بكلمه واحده

...عايشه

16 comments:

ghorBty said...

قال النبي صلى الله عليه وسلم "خير الدعاء دعاء يوم عرفة، وخير ما قلت أنا والنبيون من قبلي: لا إله إلا الله وحده لا شريك له، له الملك، وله الحمد، وهو على كل شيء قدير"

كل عام وانتم بخير والامه الاسلاميه بخير وسلام

DR.HAMAS said...

المشكلة المجتمع بينظر للى بيتزوج مرة تانية على انه خاين

و ينظر لزوجته الأولى على انها مطفشاه

و ينظر لزوجته الثانية على انها خطافة الرجالة

و كل ده مش صح

أنا معاه انه يتجوز تانى ايه المانع ... بس يكون فعلا مش مستريح مع زوجته الأولى

أو هيتزوج التانية لظروف خاصة يمليها الواقع

لكن الشرع طالما أحل ذلك لا يمكن اننا نرفض

انا شايف اننا لازم نغير نظرتنا دى

و يبقى شرع ربنا هو الحكم

عشان كلنا نستريح و نعيش فى أمان



هى فعلا قضية تستحق الإهتمام

أشكرك أختنا على طرح الموضوع

و لعل فيه تعليقات هتكون أكثر إفادة




د.حماس

مفكر said...

السلام عليكم::

كل عام وانتم بخير،،،عيد سعيد بفضل الله،،،

KHALED said...

إذا توافرت الشروط الشرعية و الواجبة فى مثل هذة الظروف فلا مانع من تعداد الزوجات
كالعدل و القدرة المادية و إفتقار الزوجة الأولى لشىء يحتاجة الرجل كالخلفة مثلا مع عدم قدرتها
فشرع الله لا جدال فية
أما إذا كان الموضوع فراغة عين فدة بيندرج تحت اللعب ببنات الناس و جرهم لجرووح هما أغنى عن أصابتهم بيها

و ربنا يهدى

من غير عنـــوان said...

أولا كل سنة وأنتم بخير

تعدد الزوجات هو شرع الله، وماحدش يقدر يحرمه أو يوبخه،، أتؤمنون ببعض الكتاب؟؟!!

وهو بدون شرط إلا (إعلام الزوجه الأولى)،، أي إخبارها وليس إستئذانها...

إنما
ليس كل رجل يستطيع فعل ذلك... وعندي تجارب في الأصدقاء وهم رجال محترمين ،، منهم من إستطاع ومنهم لا

وأيضا الزوجه الثانية،، في الأول حتقول وماله وبعد كده حتغير

وكان الصحابه يتسابقون في زواج المطلقة والأرمله لحمايتهن...

أما في هذا العصر فالقدرة المادية أصبحت شبه مستحيله ...

أيضا خروج المرأة للعمل... مع أنني موافق وأشجع عمل المرأة...

لكن كل هذا يجعل هذا الزواج صعب جدا

وبناتنا اللائي تعدين سن الزواج... أتخيل أنه لا مانع من الموافقه على زيجه ثانية.. بشرط أن تعلم أنها لابد وأن توافق على التنازل عن كثير من حقوقها وهذا صعب...وتأتي بعد ذلك حالات الحب الصادق وهي شبه نادره سواء من ولد أو بنت

أعــــان الله تعالى شبابنا على تحمل هذه الصعاب

ولك كل الأمنيات...

WSMA said...

أولا كل سنه وانتي طيبه
ياأجمل نور في الدنيا
ثانيا ندخل في الموضوع
احنا بقينا في زمن الراجل فيه بقي يعرف واحده واتنين علي مراته
وسعات كتير المشكله مابتبقاش من مراته
هتقولي ايه بقي عين فارغه
ويرجع يقولك ربنا قال مثني وثلاث ورباع
ومبيكملوش الايه
فإن خفتم ألا تعدلوا فواحدة" سورة النساء آية 66. ...
وطبعا مفيش حد هيعرف يعدل
هو طبعا المشكله بتجي سعات من الواحده من اهمالها لبيتها وجوزها
بس سعات اكتر انه بيحب التغيير
.....
بس المشكله برده ان عدد البنات كتر
ففي بنات كتير تقول وفيها ايه يعني
ضل راجل ولا ضل حيطه
هي دي مشكله فعلا
وكفايه كده
سلامي وتحياتي لكي يااجمل نور

Anonymous said...

كل عيد وأنت وكل من تعزين بخير وفي أحسن صحة وأسعد بال

r said...

طبعا الواحد مش عارف ايه الظروف اللى دفعته لكدا هل لانه خاين بطبعه
ام زوجته الاولى
مهما كانت تعددت الاسباب والمشكله قائمه
انه عايز يتجوز واحده على مراته
انا طبعا ضد المبدأ دا نهائى لان التانيه هتبان كالمجرمه فى كل الاحوال
ربنا يوفقها لاحسن منه
ويهديه
كل سنه وانتى طيبه

نــــــــــادر ضيــــــــــاء said...

السلام عليكم ورحمة الله وبركاته
أولاً دعيني أهنئك علي مدونتك الرائعه وعلي عذب كلماتك وأسلوبك الشيق

وبالنسبه لهذا الموضوع المثار فدعونا ننظر إليه بعين واعيه ونفكر فيه بأسلوب آخر
لا يخفي علي أيَ منا أن مشكلة تأخر الزواج عند الفتيات قد إستفحلت الآن
ماذا لو فكرت تلك الزوجه أنها كان من الممكن لها أن تصبح مكان تلك الفتاه التي لم يصبها الدور بعد في الزواج ؟
ماذا لو فكرت تلك الفتاه أن تكتفي بنصف رجل خير لها من انتظار رجل كامل قد يأت وقد لا يأت ؟
ماذا لو فكرت المتزوجة بالتصدق علي ابنة خالتها أو علي أحدي صديقاتها بنصف زوجها لتستقيم الحياه ولتعف فتاه مؤمنه ؟
صدقوني لو تركنا جميعاً التفكير بالفرديه الأنانية التي نفكر بها وفكرنا جميعاً في خدمة غيرنا وخدمة ديننا لإستقامت الحياه لنا جميعاً
تقبلوا جميعاً أسمي آيات الود والتقدير والإحترام

بس خلاص ... said...

السلام عليكم اختنا العزيزه
مدونتك رقيقة جدا بس مش عارفه ليه مسحة الحزن انتى لسه شابه فى بداي حياتك وماشاء الله مهندسة يعنى من وجهة نظرى عندك كل مقومات السعاده .. لكن نجد انفسنا نميل الى الشجن احيانا.... وبالنسبه لصديقتك انا شايفة ان الرأى من سبقونى فى التعليق فيه كثير من الحقيقة فعلا احنا فى مجتمع ظالم جدا جدا وينظر الى الامور من خلال منظور ضيق جدا .... فأنا ارى اذا كان هناك حاجة ضروريه وماسه للزواج الثانى فلا بأس فلقد احله الله كما احل الطلاق وهذا حل ربانى ..بدلا من الانحرافات او العقد النفسيه التى قد تترتب عن ذلك .. ولكن المطلوب فقط ان نتحرى الحقيقة ونكون صادقين مع انفسنا اولا ...

msafa said...

تحياتى ليكى وللبوست الرائع ده
كمان انا سعيد جدا لزيارتك المدونه
الموضوع بقى
نسبى جدا لان كل واحد بيحسب الحاجات من وجهه نظره
يعنى فى ناس او رجاله ستاتهم مافيهاش عيوب ظاهره زى الامراض او الاختلال العقلى مثلا لا ... فى مركبات نفسيه غريبه يعنى تصورات افكار مبادىء حاجات كده
فبيضطر الواحد من دول انه يدور على حد تانى يحتويه
معرفش حتى ده كمان من وجهة نظرى
بس طبعا هو قرار صعب جدا
لانه فيه تفاصيل معرفش يعنى ممكن يكون شكلها ازاى
بس فعلا الله يعينها ويعينه

zainab said...

أولا الموضوع جميل
ثانيا مش عارفه أقولك ايه؟
بسأنا شايفه إن اللى عملته صاحبتك عندها حق تبعد

Empress appy said...

اللى بيتبنى على غلط بينتهى غلط هى كان لازم تبعد

Mahmoud farag said...

مهندسة نور

كل سنة و انتي طيبه و بأفضل حال

هو صحيح أنا ضد ان الواحد يتزوج أكتر من واحده

بس صدقيني اللي بيحب مراته بجد عمره ما هيتجوز عليها

و اللي بيتجوز ده على مراته من غير سبب كده يبقى اكيد مكنش بيحب بجد يا اما عنده معاني تانية غير الحب الحقيقي

لكن بقى البنات تعلق تقولك الراجل بيحب التغيير

ايه يا جماعه هو هيغير تي شيرت لابسه و يجيب واحد جديد!!!!

الاسباب اكبر من كده بكتير

و غيره من الاسباب السطحيةاللي بتتقال

تقبلي مروري و كل سنة و انتي طيبة

zainab said...

أتشرف بدعوة سيادتكم لزيارة مدونتى الجديدة ( نور على نور)

www.zainab-norelhaya.blogspot.com

و أرجو الإدلاء بأرائكم

رشا عبد الرازق said...

المسلسل اليومي يا نور

عندي كلام كتير عشان ده واقعنا المعاش يا عزيزتي

بس حاليا مش هقدر أعلق

بحييك على المدونة

وقولي لصاحبتك

" إنما يوفى الصابرون أجرهم بغير حساب " لي عودة ان شاء الله تعالى

وكل عام وأنتِ بخير :)