لخابيط الفترة اللي فاتت

مسافرة دمياط وسط مظاهرات حاشدة في وسط البلد يا دوب خرجت كلو قفل25\2
27\2 راجعه من دمياط بعد ايام حافلة بالاخبار عن مظاهرات ضد قتل الناس والبلد مقفوله
قلنا مطرح ما هيقف السوبر جيت هنتظاهر وقف بورسعيد وقف الاسماعيليه واتحبسنا هنتظاهر معاهم
28\2 جمعه الغضب وقفت اتظاهر من بلكونه بيتنا بعد ما عرفت اخيرا اني فاقدة الاهلية من ماما
28\2الي 11\2
مظاهرات مشرفة
ضحايا تسققط
ناس بتتصاب معارك خيول و حصنه
شباب بيموت وبيتصاب
شباب بيبات في الشارع في البرد والمطر
نايمين علي الارض بيضربوا بالنار و الطوب
بيتهددوا بالطيران لكن الجيش هو اللي حمانا
بيانات واشاعات و تنحي ولا
سهرانين تعبانين مش متحملين
خفنا ليالي فضلنا صاحيين مي بنام ناس بتدخل الاحياء تضرب نار اول مره نبات جوه بيوتنا خايفين قلقانين مرعوبين واخواتي ماسكين خشبه علي سكينه تحسب لانهم يوصلوا جوه العمارات
ايام تقيله وحذر ووسط ده تلاقي شباب حلوين متفائلي كأنهم بيموتوا وهم مبسوطين
تشوفهم تحس انك قليل اوي
تمر ايام ويتنحي الرئيس زغاريد وافراح
ننزل التحرير اشوف بواقي المعارك دبش و حجاره وبواقي ناس مصابين
وشويه مشمع بيهم متغطيين قال و ايه نايمين
ودكاتره في الشارع قاعدين معاهم شويه شاش وقطن للمصابين
كل ده اتحول لفرح كبير واعلام بطير و ناس بترقص و تغني مش مصدقين
وناس تاني مبسوطين بيوزعوا ملبس وهم فرحانين
ولازم ما ننساش جيش رائع راقي
الناس ماشيه بتبوسه و تحضنه ما هم اخواتنا واولادنا
وناس تاني لهم شهداء ابطال و في عز حزنهم تلاقهم فرحانين
ياااااااااااااااااه يا بلدي
اخيرا رجعتيلي
قدرت اقولها والله كانت ضاعت ظلام الظلم وقسوة القلب
بحبك يا بلادي بحبك يا مصر

بسم الله الرحمن الرحيم ..الاجابة مصرررررررر

مبرووووووووووووك
الف مبروك لينا كلنا
أخيرا رحل الطاغية
انتهي عهد الظلم
لأول مره يا بلدي انزل أشم هواكي
لأول مره يا بلدي أفرح معاكي
لأول مرة أشم ريحه هواء جديد
يوم تاريخي 11\2\2011
لن أنسي هذا اليوم ما حييت
بحبك يا مصر

إزااااااااااااااااااااااااااااي؟

إزاي ترضيللي حبيبتي
اتمعشق في اسمك وانتي
عمالة تزيدي في حيرتي
ومنتش حاسة بطيبتي ازاي
مش لاقي في عشقك دافع
ولاصدقى فى حبك شافع
ازاي انا رافع راسك
وانتي بتحني في راسي ازاي
انا اقدم شارع فيكى
وامالك من اللى ماليكى
انا طفل اتعلق بيكى
فى نص السكه وتوهتيه
انا لو عاشقك متخير
كان قلبى زمانه اتغير
وحياتك لفضل اغير فيكى لحد مترضى عليه
إزاي ترضيللي حبيبتي
اتمعشق في اسمك وانتي
عمالة تزيدي في حيرتي
ومنتش حاسة بطيبتي ازاي
مش لاقي في عشقك دافع
ولاصدقى فى حبك شافع
ازاي انا رافع راسك
وانتي بتحني في راسي ازاي
ازاى سايبانى بضعفى
طب ليه مش واقفه فى صفى
وانا عشت حياتى بحالها عشان ملمحش فى عينك خوف
وفى بحرك ولا فى برك ازاى احميلك ضهرك
وانا ضهرى فى اخر الليل دايما بيبات محنى ومكشوف
انا اقدم شارع فيكى
وامالك من اللى ماليكى
انا طفل اتعلق بيكى
فى نص السكه وتوهتيه
انا لو عاشقك متخير
كان قلبى زمانه اتغير
وحياتك لفضل اغير فيكى لحد مترضى عليه
إزاي ترضيللي حبيبتي
اتمعشق في اسمك وانتي
عمالة تزيدي في حيرتي
ومنتش حاسة بطيبتي ازاي
مش لاقي في عشقك دافع
ولاصدقى فى حبك شافع
ازاي انا رافع راسك
وانتي بتحني في راسي ازاي

قصة حقيقية- انا ومفيد شهاب

الحمد لله رب العالمين
بالفعل دعوة المظلوم يرفعها الله فوق السماوات
ويقول وعزتي وجلالي لانصرنك ولو بعد حين
النهاردة تمت أقالت السيد الدكتور مفيد شهاب بس سنين طويلة تقلد بها أعلي المناصب
حكايتي معاه من 10 سنة كنت متقدمه لشغل وظيفه مدرس مساعد باحدي الجامعات
وكان الاعلان متفصل لبنت لها ظهر
ومن حظي ان شروط التقديم لم تنطبق عليها فقدمت اوراقي انا
وكنت الوحيدة المتقدمة للوظيفة
وتم رفض تعييني بالدرجه و تم الغاء الدرجه كلها
ما هو يتاخذها البنت اللي لها واسطة أو تتلغي
المهم رحت أقابل رئيس الجامعة معرفتش قالي مدير مكتبه ان عنده اجتماع في مبني كذا
المهم رحت المبني ومكنتش عارفه ايه ده وانا في الاسانسير طالعه عرفتانه مكتب وزير التعليم العالي ومكنشت عارفه والله
صادف توقيت دخولي دخول مفيد شهاب وكان وزير التعليم العال يوقتها
لاقيت الحرس بيقولوا مين دي خرجوها اصريت ووقفت
لاقيته شاور قال لحد شوفوا عايزة ايه
لاقيت بيه كبير طلع احدي مستشاريه تكرم ودخلني مكتب وقالي اكتبي طلب أنتي جايه ليه
طتبت الطلب و ارفقت معاه الاعلان و كل الظروف و موثقه
وأشر عليها السيد الوزير وقتها بعرض الامر و اتخاذ الللازم
وراح الطلب بالتأشيره للجامعة و لا حياة لمن تنادي
شهور و أنا بين الوزراه و مكتبه و الجامعة
وضاع حقي بالوظيفه و تغير مسار حياتي كله حتي الان و اكرمني ربي
بوظيفه أخري بأحدي الكليات الاقليمية و أضر الي وقتنا هذا السفر أسبوعيا للعمل هناك
تاركه ورائي بيتي و امي و حياتي
و اليوم فقط أكرمني الله بأخذ حقي منه
فالحمد لله رب العالمين

هو حلمي راح ؟ولا لسه

أول مرة من سنين
أحلم
أصل احلامي مش بتتحقق
بس حلمت
كنت اظن
كنت اظن و خاب ظني
وما بقي في العمر شيء
وأحتريتك
وتظل الاماكن كلها مشتاقة لك